අද  අරන් ආවේ මේ අවුරුද්දේ ආපු සුපිරි කොරියන් ෆිලුමකට. නම තමා Hijack 1971. මේ අවුරුද්දේ ජුනි 21 වෙනිදා තිරගත වුනු මේ චිත්‍රපටිය ඩොලර් මිලියන 13.4 ක ආදායමක් ලබාගෙන 2024 කොරියානු බොක්ස් ඔෆිස් ලැයිස්තුවේ පස්වෙනි ස්ථානයට එන්න සමත් වෙනවා. පැයයි විනාඩි හතළිහක් පුරාවට ගලන් යන මේ ෆිලුම Action, Adventure, Thriller, Crime යන ගනයන්ට අයිති වෙනවා. Hijack 1971 චිත්‍රපටියේ අධ්‍යක්ෂණය Kim Seong Han විසිනුත්, තිර රචනය Kim Kyung Chan විසිනුත් සිදු කරනු ලබනවා. මන් කැමතිම කොරියන් නළුවෙක් වෙන Ha Jung Woo ඇතුළුව Yeo Jin Goo, Sung Dong Il, Chae Soo Bin වගේ සුපිරි නළු නිළියෝ රැසක් මේ චිත්‍රපටියේ රංගනයෙන් දායක වෙනවා. ෆිලුම ගැන කිව්වොත් මේක 1971 වර්ෂයේ සිදුවුන සත්‍ය සිදුවීමක් පාදක කරගෙනයි නිර්මාණය කරලා තියෙන්නේ.

《CAST – රංගන දායකත්වය》

• Ha Jung Woo – ටේ ඉන්
• Yeo Jin Goo – යොන්ග් දේ
• Sung Dong Il – ග්යු ශික්
• Chae Soo Bin – ඔක් සුන්

《Summary – සාරාංශය》

1971 වර්ෂයේ ජනවාරි මස 23 වන දින පස්වරු 1:07යි…

සෝල් බලා පිටත් වෙන හොටෙල්-ලිමා 5212 ගුවන් යානය හැමදාම වගේ සාමාන්‍ය විදියට ගුවන් ගමන ආරම්භ කරනවා. ඒත් නොහිතපු විදියට ගුවන් යානයේ ආධිපත්‍යය සුළු වෙලාවකින් තම අතට අරගන්න එක තරුණයෙක් සමත් වෙනවා. ඒ එයා ළග තිබුණු බෝම්බ පාවිච්චි කරලා. දැන් ගුවන් යානය තියෙන්නේ හයිජැකින් තත්වයක. ගුවන් නියමුවෝ දෙන්නට හයිජැකර් බල කරන්නේ, ප්ලේන් එක උතුරට ගෙනියන්න කියලා. ගුවන් නියමුවන්ට වෙන විකල්පයක් නැති නිසා උතුරට හරවනවා. උතුරේ දේශසීමා පැන්නොත් ආයේ එන්න පුළුවන් වෙයිද කියන බයෙනුයි මගියෝ 58 දෙනාම මේ වෙලාවේ ඉන්නේ. බෝම්බය පිපුරුණු වෙලාවේ ඇස්වලට තුවාල වුන නිසා ප්‍රධාන නියමුවාගේ ඇස් දෙකම පේන්නැති වෙලා ගිහින් දැන්. සම්පූර්ණ වගකීම තමන්ගේ අතට අරගෙන යානය අරගෙන යන්නේ සහය නියමුවා.. ටේ ඉන්. ඉතින් ටේ ඉන්ට යානය උතුරට ගෙනියන එක වළක්වන්න පුළුවන් වෙයිද? යානය හයිජැකින් තත්වයෙන් ගලවගන්න පුළුවන් වෙයිද? මේවට උත්තර දැනගන්න නම් අනිවාරෙන් මේ ෆිලුම බලන්න.

• Korea